La gazette piétrolaise
A Petra di Verde, u nostru paese
Les “DEGORDÌ”
Philippe STRABONI (Filippu DEGORDÌ) (1928- )
À l'amicu di l'engrais
1 - M’avìe sempre prumessu
Di dammi un pugnu d’engrais
Ma dipoi ti scontru aspessu
Incù u più grende piecè
Chi simu amici listessu
Ancu si t’un pensi à mè.
2 - Stammi à sente una seconda
A ti dicu chiara e netta
Simu parenti à a longa
Ma l'amicizia é ristretta
Credila puruchi gjé vera
A mea é franca e sincera
3 - Eo t'aghju cunsultatu
Chi ti sapìa un’espertu
Ùn lu t’aghju dumandatu
Si tu chi u m’hai offertu
Ma cansati o cameratu
Chi u portone é sempre apertu
4 - Quand'e tu passi davanti
Sia di mane o di sera
Sappie chi si tu ti cansi
Ti ricevu incù manera
C'é sempre qualcosa à beie
Di frescu in a miò ghjacera
5 - Qualchi volta si prumette
E po dopu ùn si pò tene
Si parla senza riflette
Di cosi cum’ella vene
Ma dopu ùn c’é più secretu
Ci vole à fà merchja in daretu
6 - Sappie c'o ùn ti ne vogliu
E c'o l'ùn ci contu più
N'aghju fattu lu miò dogliu
E postu chi t'unn hai tu
Ci vole c'o facci appellu
À ange u to fratellu
7 - Ange per fammi piecè
Unn é daretu à nisunu
S’ellu unn ha micca “engrais”
Mi dà u suvu caprunu
Incun ellu unn aghju penseri
Chi u mi dà vulenteri
8 - A face senza interessu
Sò sicuru e ùn mi stona
Si pè u listessu prezzu
Mi ne furnisce una tona
S'o spazzu u mandrione
Mi ne dà chercu u vagone
9 - A miò sepe é rughjinosa
Ha scambiatu di colore
Ci vole c’o facci qualcosa
C’altrimente si ne more
U so avenire é tristu
Sò ùn trovu un spezialistu
10 - Ma a tidicu o Natà
Ùn ci vo per quatru strade
Ùn ti n'aghje da inchjetà
Chi ùn c'é nunda di grave
Di sepe unn aghju premura
S'ella more crépatura
11 - In posta per Purettone
Aspettendu u cignale
Aghju fattu ste canzone
Ma ùn la ti piglià à male
L’aghju cumposte in riera
Ùn ci trovà gattivera.
L'erba di l'Ascensione
1- Mi sò arrizzatu à bon’ora
E fieru cume un paone
Mi ne sò andatu fora
Appoghjatu à u bastone
Decisu di perte à coglie
L’erba di l’Ascensione
2 - Essendu di u locale
Ci aghju qualchi cunniscenza
C'é sempre qualchi ripale
Induv'ella c'é in abbondenza
Sò chi cogliela ci vole
À lu spuntà di lu sole
3 - Unn avendu d’andà luntanu
Moderatu aghju lu passu
Cù lu miò stuvigliu in manu
Sò ghjuntu in fondu d’un chjassu
E pigliatu aghju bellu bellu
A strada di l’Erbarellu
4 - Essendumi fattu croce
Incù fede e devozione
E preghendu sottu voce
Mi n'aghju empiutu un stagnone
Eppoi sò ritornatu in casa
À fà a distribuzione
5 - Aghju sceltu a più bella
E n’aghju fattu un pachettu
Per dalla à a miò surella
Chi a leia inc’un frisgettu
Sò ch’ella la da appende
À u capu di u lettu
6 - I pachetti preparati
Incun amore e cun grazia
À i vechji e à i malati
A l'aghju portata in casa
Offerta cun gran rispettu
Spergu ch'ella faccia effettu
7 - N’aghju datu à chi sò ghjunti
l’aghju offerta di bon core
Ch’elli prufitinu tutti
Prutetti da u Signore
Pace e salute li dìa
Per cent’anni e cusì sìa
8 - Un altr'annu si Dio vole
Sò mi sentu sempre in forma
Ricumenciu e miò prove
E pertu à circanne torna
É cusì sò ùn m'abusu
Ch'ellu si mantene l'usu
9 - Ùn sò s’ell’a vi cunvene
Ciò c’o facciu à st’occasione
Ùn site obligati à tene
L’erba di l’Ascensione
Ma eo la facciu per mantene
L’usi incù la tradizione
10 - Si voi unn avite fede
Fate cum'ella vi pare
Ùn site obligati à crede
À la so manna universale
Ma si st'erba unn ha potere
Ùn vi ferà mancu male
