La gazette piétrolaise
A Petra di Verde, u nostru paese
Les “DEGORDÌ”
Jacques STRABONI (Ghjacumu DEGORDÌ) (1921-1987)
A caccia
1- Sta mane nenzu à ghjornu
M’aghju ficcatu e botte
Eppo mi so capulatu
In la cima di e Ciotte
Ma s’o ci riflettu à fondu
C’é da pienghje la miò sorte
2 - Ditemi s'aghju lu tortu
O s'averaghju ragione
Capulassi pè le Ciotte
Ghjustu pè tombà un piccione
Ci vole veratimente
D'aveci a passione
3 - Vi giuru chi i cacciadori
So francamente mischini
Senza contà a fatica
U permessu e i pallini
Chi li porta benefiziu
Andà dunde Vincensini?
4 - M'unn é micca pè a cherne
C'aghju fattu u mischinu
Avìa prumessu e piume
À José u miò vicinu
Chi Toussainte la so moglia
Vulìa fassi un cuscinu
5 - Ma avà l’aghju decisa
E quand’o falu a feraghju
Vogliu comprà dui copii
E metteli in pullinaghju
Chi cusì quandu i vogliu
I piccioni l’averaghju
6 - A caccia vogliu abbandunalla
A dicu libera e franca
Mi pesa u fucile in spalla
Cumencia à sentemi l'anca
Quandu collu à u paese
Vogliu stà nantu a panca
7 - Quandu collu à u paese
Ùn vogliu più andà ‘ndocu
Mi vogliu stà in piezza à u sole
S’ell’é tempacciu à u focu
Cusì in li miò vechji ghjorni
Mi riposeraghju un pocu
8 - Avà salutu i parenti
L'amici e i paisani
À c'ha fattu ste canzone
E scritte di le so mani
É Ghjacumu di A Petra
Maritatu in Alisgiani
A morte di Bijou
1- Aiò svegliati la miò musa
E ùn la ti fà più dì
Vurìa fà duie canzone
Eppo mandalle à Julie
Aghju amparatu stamane
Ch’ell’é mortu u so cane
2 - Vi giuru chi ssa nutizia
Per mè unn é stata bella
O quantu ci aghju pensatu
À Julie a miò surella
S'o m'era trovu in A Petra
Averìa pientu incun ella
3 - Ùn la possu micca dì
Quantu lu core mi sente
Una nutizia cusì
Dispiece à tutta la ghjente
Unn ha fattu malatìa
Chi é mortu d’accidente
4 - Ch'ellé mortu d'accidente
A cosa é certa e sicura
L'ha lesciatu sorte fora
E l'ha tombu una vittura
Ma per connosce u scioffore
Ci vogliu mette primura
5 - S’o connoscu u scioffore
Quellu c’ha tombu à Bijou
U vogliu vendicà eo
Si tu nun la faci tu
Chi canucciu cume ellu
In La Petra ùn ci n’é più
6 - Eo sò bè ch'eo à pienghje
Ùn sò micca statu solu
Chi quand'elli l'hanu intesa
Ha messu u paese in dolu
Sò ghjunti da u Casone
U muchju a u Paisolu
7 - Ch’elli so venuti tutti
So bè ch’ell’unn é bugìa
Pare chi eranu in piezza
E tutt’ognunu dicìa
Cumu la supporteranu
Filippu e Ghjulia Marìa
8 - Pigliatela cun pazienza
Surelluccia e tu cugnatu
S'o connoscu u scioffore
Quellu chi u ci ha tombatu
Aghju fattu un ghjuramentu
Bijou serà vendicatu
9 - Chi ti manda sta canzona
È Ghjacumu u to fratellu
Scritta in gara di Bastìa
À vicinu à u tunellu
Per rimpiezzatti à Bijou
T’alleveraghju un catellu
10 - Avà termingu a miò musa
Chi é meza faticata
Ma chi ha fattu sta canzona
É quellu chi l'ha mandata
É Ghjacumu u so nome
Straboni a so casata
A morte di Curiera
1-Vorebbi impiegà a musa
Perchi u core si lagna
Ùn la possu supportà
A morte di la miò cagna
Chi cume ella ùn ci n’era
Per girà pieghja e muntagna
2 - Per mè l'annata cinquanta
Vecu chi principia male
La morte di la miò cagna
É statu un colpu fatale
Ella currìa la volpe
La levra e lu cignale
3 - Quandu ghjunghja à a mandria
Fussi di mane o di sera
Eo per tornà e capre
Ùn mi rumpìa l’idea
Bastava c’o dicissi é ora
Aiò parale o Curiera
4 - Amici in le miò canzone
Ùn vi contu micca una storia
Di cena ne cullazione
Ùn mi ne ghjunghje la voglia
Perchi vecu pienghjulà
Mane e sera a miò moglia
5 - Ange et Paul i miò figlioli
Ùn la ponu supportà
Quandu rientru a sera
Mi dumandanu o Papa
Induve é Curiera
Chi ùn si vede affaccà
6 - Eo mi sentu strappà e vene
Mi sentu crepà u core
Quantu sò forti e pene
Ùn la sà che u Signore
Perchi pensu à Curiera
Ghjornu e notte à tutte l'ore
7 - Quandu hanu ‘ntesu a nutizia
So stati tutti scuntenti
In lu cantone di Verde
L’amici cù li parenti
Ma u peghju era per me
Ch’eranu lacrime e pienti
8 - I miò amici vicinenti
Ci hanu trovu dispiecere
Ghjunsenu tutti scuntenti
À fà perte di dovere
Tuttu u mondu si lagna
Di a morte di a miò cagna
9 - Prim’à ghjunghje fu Ghjan Battista
La moglia incù li figlioli
Mi dissenu o Ghjà coragiu
Ci vole à supportà ssi doli
Avà l’hai pienta abbastanza
Ti ne troverai un’antra
10 - Fu una sera dopu cena
Ch'elli ghjunsenu l'alrti amici
Ziu Paulu e la so moglia
Incù Mertinu Luigi
Tuttu u mondu addispera
A morte di Curiera
11- Quandu hanu intesu a nutizia
In la casa di Ciavattone
Affacconnu tutti uniti
Parìa una prucessione
Si vo l’avissete visti
Era pienu u stradone
12 - Avà termingu u miò fgliu
Cappiu a penna à a lesta
Ma c'ha fattu ste canzone
Amici vi serà detta
É Ghjacumu Degordì
C'abita à la maisonnetta
Nanna per Valérie
1 - Fà ninn’o ciuccia
Dormi a miò figliolone
Chi per cantati qui c’é u to babbone
Ti ne feranu altretantu
Quande tu sì à u Casone
2 - U to Babbone a to mémé Catalina
Ti canteranu a sera e a matina
Ma avà c'o t'aghju qui
Tocca à mè a miò figliulina
3 - Tocca à noialtri avà chi t’avimu qui-ne
A to mémé Rosa e to duie cucine
Eppò c’é Paul e Elena
Chi collanu anch’elli appena
4 - A sò anch'eo u to pépé 'Nghjulu-Santu
Ti tene caru ti cura ed é cuntentu
Ma unn é micca cume mè
S'ellu s'agisce di lu cantu
5 - A sai bè chi per fà e canzone
Micca in paese ma in tuttu u cantone
O quantu n’hanu parlatu
Di Babbu di Sesè e di ‘Ntone
6 - Avà sò eo quandu l'estru mi piglia
Vi facciu sente c'o sò di a famiglia
Di parecchji Perdullacci
Sai bè c'o unn aghju 'mbiglia
7 - Ma per sta sera vogliu restà cusì
A cosa é vera sò di I Degordì
Fà la ninna e fà la nanna
Adormentati o Valérie