La gazette piétrolaise
A Petra di Verde, u nostru paese
Les “DEGORDÌ” Suite des textes d’Antoine Straboni (1)
À u miò amicu navari
1 - Impruvisà di tantu in tantu
Unn é mai tempu persu
Pocu importa u miò cantu
A miò voce o u miò versu
Basterìa c’o fussi intesu
Da u miò amicu di Malersu
2 - Ci vole un evenimentu
Per c’o mi rimetti à scrive
Ùn c’é più quellu talentu
E rime sò negative
Ma pè riempie un dovere
Ci vole à falla cun piecere.
3 - L’avete ricunisciutu
St’amicu francu e sinceru
Incù prenome pinzutu
Unn é micca furesteru
Di cumpone e cantà in corsu
È lu so primu penseru.
4 - Benche chjamatu Tintin
Eo u nomeraghju Ustinu
Perch’in Corsu, j’en conviens,
Ghjé megliu che in pariginu
É nativu d’Alisgiani
E cambia u so destinu.
5 - Ha scrittu à u miò fratellu
E aspetta una risposta
U so amicu unn é più quellu
A canzona ùn l’ha cumposta
Da pieghja à u Cuntinente
Forse é ‘nterdetta a posta.
6 - À u Colombu una sera
Intesi quelle canzone
Ùn mi parse mancu vera
Di mancà st’occasione
Ugeniu s’ellu stà zittu
Ne spiegherà a ragione.
7 - Rimpiezzu u miò fratellu
Senza esità saltu in ballu
Ùn sò manch’eo un modellu
Ma vogliu riparà stu fallu
Stu giovanu impinzutitu
Li dumandu di scusallu
8 - U miò amicu era stonatu
Di a so rima in francese
Ghjé vera ch’ell’un é statu
Che à a scola di u paese
Ma ogni tantu l piglia
Soca é un donu di famiglia.
9 - Scriveraghju anch’eo qualcosa
Benche vechju e capibiancu
À l’adiritu e à l’aritrosa
Ma ch’ell’ùn si dica mancu
Chi unu di I Degordì
Unn é statu prontu e francu
10 - Eo ùn possu lescià core
Perch’aghju qualcosa à dì
Cercu di salvà l’onore
D’unu di I Degordì
Chi Babbu da l’altru mondu
Ùn ci abbia da maladì
11 - Di te ùn si n’é scordatu
Ne parla ancu più che prima
Dipoi ch’ell’é imbercatu
L’ha traditu a so rima
Malgradu u so silenziu
Ti porta rispettu e stima.
12 - Ùn sò solu interessatu
Perche andà più lontanu?
Si u miò fratellu ha mancatu
Qeste qui ti ghjunghjeranu
Accetta sti dui filari
E una sretta di manu
13- Prestu pertu in Cuntinente
À vede u miò fratellu
S’ellu mi stà sempre à sente
Ti risponderà da per ellu
Eo penseraghju à te
Quandu pigliu u battellu
14 - Scusami d’avè rispostu
Senza chi tu m’abbie chjamatu
Ugeniu unn era dispostu
Dunque l’aghju rimpiezzatu
Era per tene prumessa
Micca per fà l’avocatu.
15 - Qui finiscu, chi ne dici?
Ùn ti vulerìa dispiece
Resteremu sempre amici
Ghjé cusì ch’ellu si face
Prufitu di l’occasione
Ti pregu salute e pace.
A listinca
1 - Una listinca era nata
Sola in lu scornu di l’ortu
Pianu pianu era ingrossata
E lu so fustu era tortu
Oghje l’aghju sdraticata
Un altr’erburu s’é mortu
2 - Dumandava bellu pocu
Si sbrugliava da per ella
Oghje passerà in lu focu
U fustu e ogni rambella
E la so ceppa furcuta
Serà cundannata anch’ella
3 - Tante vite sò più corte
Perche fà u sentimentu
Per tutti vene la morte
E e lacrime e u pientu
Ùn ponu cambià a sorte
Che inspirà qualchi lamentu
4 - Ùn servenu più niente
I suspiri e i lamenti
Pè a roba e pè a ghjente
Ne finiscenu i stenti
E unn é più che u tempu
Chi pò asciuva i pienti
5 - Perchè sceglie stu sugettu
E parlà di st’erburellu
Vene terdi u rigrettu
Oghje ch’é sparitu anch’ellu
Serà perch’ell’ùn c’é più
C’o u trovu ancu più bellu
6 - Avà l'anni sò cresciuti
Sò bianchi i miò capelli
I penseri sò venuti
E più che tanti zitelli
Si riflette à ogni cosa
À li momenti più belli.
7 - A listinca ch'é sparita
Serà rimpiezzata un ghjornu
Da una vinestra fiurita
Chi perterà à u so tornu
Ne sparisce ghjente e roba
Quessa mi lescia in frastornu.
8 - Lesceraghju qualchi scrittu
Perchi tuttu ùn sìa persu
Invece di stammi zittu
Quakchi prosa o qualchi versu
Resterà per suvenire
Ma mi leghjerete à schersu.
9 - Sta ceppa chi é sparita
E chi m'ha datu st'idea
Ha passatu a so vita
E eo passu la mea
Per tutti é listessa sorte
Un ghjornu s'apre altre porte.
10 - A fine di st'erburellu
M'ha datu qualchi frastornu
Cum'ell'é pertutu ellu
Quand'ellu vene u ghjornu
Averemu u bigliettu
Per andà senza ritornu.
Degordì, Calcinaghjole, maghju 1984